بالامس حضرت حفلة تخرج دفعة 2005 كلية طب اسكندرية واحد ابن حلال يسالنى طب رحت لية يا ابنى وانت مالك؟ حرد علية واقولة اصل بصراحة بابا هو اللى بيوزع الجوايز هناك قلت اروح وادخل معاة اشوف بيعملوا اية دول.. وكمان كنت عاوز ارفع روحى المعنوية شوية لما الاقى ناس بتتخرج من الكلية دى وهى لسة على رجلها بردو الحاجات دى بتعمل ثقة فى النفس اكيد,.. الجميل فى الموضوع انى لما رحت هناك لاقيت نص الدفعه بتاعتنا اصلاهناك يظهر كلة رايح يرفع روحة المعنوية ولا اية.....

بس بصراحة حاجة جميلة لما تحس بعد كل دة انك بتتكرم وعلى فكرة كرموا واحد واحد فى الدفعه ودى حاجة كويسة هو صحيح التكريم خد بتاع ساعتين بس لما الكل يطلع على المنصة بردو برستيج كدة, لا واية كمان كل واحد لابس وشاح ازرق حاجة كدة اخر شياكة وانا كنت لابس وشاح اصفر بصراحة حتقولولى ارحم نفسك حتى الوشاح لبستة فى اية يا عم واشمعنة انت اللى لابس اللون الاصفر وسطة بردو .... لاوالله ابدا بس كان نفسي احس احساس المخلصين دول رحت رايح لاقيت واحد اصفر على جنب كدة لبستة .... المصيبة انة طلع الللون الاصفر دة بتاع اوائل الدفعه العشرة...هههههههههه كنت حروح فى داهية ربكم ستر والله

الحمد لله على كل حال وعقباااااااالى يا رب لما اكون زيهم وبالوشاح الاصفر بردو

وللحديث بقية مادام فى العمر بقية

happey mother's day

كل سنة وانتى طيبة يا امى يا اجمل ست فى الدنيا

ذهبت امس الى طبيب الاسنان فانا اعانى من وجع فى اسنانى بس وجع من نوع فريد بيروح ويجى ساعه كدة وساعه كدة قلت اروح واشوف اعمل تشيك سريع كدة واذا بى فوجئت بيقولى انا حخلعلك ضروسك اللى فوق لية يا عم؟ مش عاجبينك ولا اية لا يا اخويا حلوين بس انا عاوز انضفهم قلتلة لا انا عاوزهم وحشين كدة هما مزعلينك فى حاجة قالى النضافة حلوة قلتلة هو انا جايبلك هدومى تغسلهم دى سنانى يا حج قالى لاسف لازم تفتح بقك بالزوق احسن استسلمت للوضع وبكل براءة فتحت اسنانى وطلع ضروسى واحد تلو الاخر وانا اتحدث اليكم الان بلا اى حاجة السين عندى شين واصبحت كالعواجيز بلا ضروس مع الاعتزار للعواجيز طبعا الالام الاسنان دى طلعت مشكلة احسنلكم تعملوا تشيك كل سنة ولا حاجة المهم الدكتور بيقولى الواحد مننا لازم يغسل سنانة 3 نرات يوميا لمدة 10 دقايق دى اقل حاجة يااااة لو يعرف انا بغسلها فى قد اية هى 30 ثانية وخلاص هو انا فاضى ههه الواحد لازم ياخد باله احنا لسة صغيرين على حكاية دكتور السنان امال لما نكبر انا حعمل اية الحمد له على كل حال

استيقظت صباحا (زى كل الناس عادى يعنى)ثم استيقظت على التلفزيون (بس دة مش عادى) المهم فتحت على قناة الجزيرة الاخبارية وروحت سايبة وماشى اشوف حالى بقى (واحد صاحى من النوم حيروح يعمل اية!!!!!) ثوانى وسمعت صوت المذيع يتحدث عن طبيب مصرى لة باع طويل فى مجال الاغاثة الانسانية ولة شهرة عالمية فى ها المجال وقلت فى نفسي هو لسة مصر بيطلع منها حاجات كويسة , سمعتة يتحدث عنة وعن انجازاتة الكثيرة شدنى الموضوع وذهبت مسرعا الى التلفزيون لارى ذلك الطبيب وادعيلة دعوتين على الماشى كدة ,وهنا حدثت المفاجاة انتظرت ان يذكر المذيع اسم الطبيب المصرى هذا , واذا بى مذهولا , انا اعرف هذا الاسم انة اسم ابى نعم اعرف هذا الاسم جيدا وعندما رايتة تاكدت وتيقنت انة ابى, ظللت انادى على من فى البيت انه ابى انه ابى, فعلا لقد تعلمت الكثير منة وليتنى قد اكون مثلة فى يوم من الايام وينطبق على المثل الشهير ان ها الفسل(الى هو انا) من ذاك الاسد (اللى هو ابى), اذكر له اسفارة واغثاتة حول العالم من باكستان الى لبنان وكشمير ودارفور فى السودان .... كيف لى اب مثلة ولا افخر به اتمنى ان اصبح اغاثيا مثلة واستفيد من خبراتة الكثيرة ( من مزكرات شاب مفخور بنفسة )

حصلى موقف غريب جدا من كام يوم حبيت اتكلم عنه

الحكاية انى كنت راكب تاكسي ورايح مستشفى ناريمان (معلومة*دى مستشفى تابعة للكلية عندنا وفيها تخصصات مخ واعصاب وتخصص عظام ) المهم الراجل قالى هو حضرتك دكتور و قلتلة بسلامة نية ايوة دكتور مخ واعصاب ودى الحقيقة فعلا انى كنت شغال مخ واعصاب ساعتها, الراجل ما صدق قلتلة كدة , ومرة واحدة الراجل فرمل التاكسى ونزل جابلى اشعه من ظهر العربية وحكالى حكايتة مع المخ والاعصاب, اللى فهمتة منه انه عندة مشكلة اسفل سلسلة الظهر بس الحمد لله شرفت الناس كلها وقلت للراجل مشكلتة (اصلى كنت لسة مزاكرها ) وعلاجة وطبعا العلاج زى ما انتم عارفين مهدات و الذى منة عشان الوجع, وقلتلة يعمل علاج طبيعى عشان ظهرة , الراجل فرح بيا جدا , انا شكلى حطل دكتور ولا اية مش عارف , انا خايف اطلع دكتور فى الموقف بقى على كدة ....